វត្តឧណ្ណាលោម

វត្តឧណ្ណាលោម ជាវត្តមួយធំជាងគេក្នុងកម្ពុជារដ្ឋ នាបច្ចុប្បន្នសម័យ ។ នៅទិសខាងកើត មានទន្លេចតុមុខដែលមានធារទឹកធំល្វឹងល្វើយ,។ ទិសខាងត្បូង មានវាលព្រះមេរុនិងនិវេសន៍វាំង គួរជាទីស្ញប់ស្ញែង នៃទស្សនិកជនទាំងឡាយ។ ទិសខាងលិច មានពន្ធនាគារជាទីស្ញប់ស្ញៀម។ ទិសខាងជើង មានផ្សារមួយ ហៅថា ផ្សារកណ្តាល។
នៅក្នុងអាវាសនោះ មានព្រះវិហារមួយ កំពូលដូចប្រាសាទបុរាណខ្ពស់ស្កឹមសៃ្ក មហាកុដិជិតនោះមានកំពូល ប្រដាប់ដោយជហ្វាដងក្តារ។ មានឈាបនដ្ឋានមួយធំ ស្ថិតនៅទិសពាយព្យនៃមហាកុដិ។ នៅទិសឧត្តរនៃមហាកុដិមានចេតិយមួយធំ ដែលរដ្ឋាភិបាលនិងពុទ្ធបរិស័ទសាងឡើង សម្រាប់តម្កល់ព្រះអដ្ឋិធាតុ ព្រះសង្ឃរាជ ឬ ព្រះសង្ឃនាយក ។ ក្រៅពី នោះមានកុដិជាច្រើនស្ថានបនាដោយឥដ្ឋនិងស៊ីម៉ង់ត៍ស្ទើរតែទាំង។ ក្នុងកុដិនីមួយៗមានវច្ចកុដិបរិបូណ៍ ដោយអនាម័យដ៏ល្អៗ គួរជាទីជ្រះថ្លា ។

អំពីវត្ត

វត្ត ជា​លំនៅ​នៃ​បុព្វជិត អ្នក​ប្រព្រឹត្ត​កុសលធម៌ ដើម្បី​ចេញ​ចាក​កាម​និង ដើម្បី​សិក្សា​អប់រំ​បន្ទុំ​កាយ​ឲ្យ​ឆ្ងាយ​ចាក​អវិជ្ជា។
វត្ត សំដៅ​យក​ទី​អាវាស​ទាំង​មូល ដែល​មាន​ព្រះ​វិហារ​កុដិ ឧបដ្ឋាន​សាលា​ ពុទ្ធិកបឋមសិក្សា សាលាបឋមសិក្សា ហោត្រ័យ ចេតិយ ឈាបនដ្ឋាន វច្ទកុដិ តំាង​នៅ​ច្រូង​ច្រាង តម្រៀប​គ្នា​ជា​ជូរ គូរ​ជាទី​ជ្រះ​ថ្លា។ ក្រៅ​ពីនោះ​មាន​សួន​ច្បារ​លាយ​ចម្រុះ ដោយ​បុព្វ​ជាតិ​ផេ្សង​ៗ មាន​ដើម​រុក្ខជាតិ​ធំ​ៗ បែក​មែក​សាខា​ប្រកប​ដោយ​ម្លប់​ត្រឈឹង​ត្រឈៃ​ស៊ុមទ្រុម​គួរ​ជា​រមណីយដ្ឋាន​ដល់​ឧបាសក ​ឧបាសិកា ដែល​មាន​ចិត្ត​សាង​សីល​ទាន​ដើម្បី​ជា​សម្បតិ្ត​ទៅ​កាន់​បរលោក។